Bruselan Europako Batzordeak antolatutako European Biotech Clusters topaketan parte hartzeak BHCren nazioartekotze-estrategian aurrera egitea eta Europako bioteknologiaren etorkizuna lantzen duten sareekiko harremanak sendotzea ahalbidetu du.

Europako bioteknologiaren etorkizuna eskualdeen arteko lankidetzaren bidez ere eraikitzen ari da. Testuinguru horretan, Basque Health Clusterrek European Biotech Clusters: Connect. Collaborate. Scale. topaketan parte hartu zuen Bruselan. Europako Batzordeko DG SANTEk antolatutako jardunaldiak Europako hainbat kluster eta bioteknologia-ekosistemetako ordezkariak bildu zituen, lankidetza-aukerak eta European Biotech Act ekimenaren garapenari lotutako erronkak aztertzeko.

Basque Health Clusterrek topaketa honetan parte hartzea bere nazioarteko posizionamendu-estrategiaren barruan kokatzen da: Euskadiko biozientzien eta osasunaren sektorearen presentzia Europako sareetan indartzea, aliantza estrategikoak sustatzea eta enpresa elkartuei lankidetza- eta berrikuntza-aukerak hurbiltzea.

Euskadi Europako bioteknologia-sareetan

Jardunaldian, Idoia Muñoz Basque Health Clusterreko zuzendari nagusiak klusterren arteko lankidetzari buruzko saioa bideratu zuen, Biocat eta LithuaniaBIOko ordezkariekin batera.

Eskualdeen arteko lankidetza enpresentzako aukera zehatz bihurtzeko moduak izan ziren eztabaidagai. Besteak beste, azpiegitura eta gaitasun espezializatuetarako sarbide partekatua, aliantza estrategikoak eta berrikuntza zein industria-eskalatzea sustatzeko lankidetza aztertu ziren.

Topaketak aukera eman zuen, halaber, CEBR (Council of European BioRegions) sareko beste kluster eta bazkide batzuekiko harremanak sendotzeko eta Europako ekosistemen arteko lankidetza-aukera berriak identifikatzeko.

Europako konexioetatik industria-aukeretara

Eskualdeen arteko lankidetza bereziki garrantzitsua da Europak lehiakortasuna, bioteknologiaren ekoizpen-gaitasuna eta autonomia estrategikoa indartu nahi dituen une honetan.

Basque Health Clusterrek horrelako guneetan parte hartzen du Euskadiko bioteknologia- eta osasun-sektorearen gaitasunak Europako lehentasun eta aukerekin konektatzeko. Ildo hori bereziki garrantzitsua da terapia aurreratuen biofabrikazioaren esparruan, lankidetza, azpiegituretarako sarbidea eta industria-gaitasunen garapena funtsezkoak baitira.

Jardunaldian, elkarrizketei jarraipena emateko eta lankidetza-ekimen berriak garatzeko hurrengo urratsak ere zehaztu ziren.

Parte-hartze honekin, Basque Health Clusterrek Europako sareetan duen presentzia eta euskal enpresen eta nazioarteko lankidetza-guneen arteko lotura sustatzeko duen eginkizuna indartzen jarraitzen du.